Puterdo Dive vash komunitetya
Ofisi vash Komunitetenge Puqipya organizingya Puterdo Dive vash Komunitetya ani Kosovaki Akademia vash Publikuno Siguripe. Akava ovipe organizisalo ano tang ledeipe e Kosovaka Akademia vash Publikuno Siguripe thay kedingya khetane pedral 65 terne e komunitetengo, may buderi kotar o palune bersha e mashkaruna shkolako thay anglune bersha e studiengo, kotar e sah Kosova. Resipe e ovipesko sine kay on te informingyon e shaipyenca vash shrdipe e kariereako ano institucie e publikune siguripesko.
Leindoy pe dikhipe o nakhlo organizipe e Puterde Divesko vash Komunitetya e datako: 15 novembri 2023, butyardile enya terne kotar o komunitetya ano institucie e publikune siguripesko, akava evenimenti sinele vi yekh yaver dimenzia. Pashe e Akademiake, programya thay olenge shaipya mothavde ini sevalutne kotar Kosovaki Policia, Kosovaki Dogana, Dikhipesko Servisi e Kosovako, Kosovako Policiako Inspektorati thay Agencia vash Menajipe e Emergencengo.
Ministri e Andrune Butyengo, Xhelal Sveçla, bahtakergya e ternen kotar nabuderune komunitetya vash akava bajako kay on lele direkt a shaipeske vash shrdipe olenga karierako ano institucie e publikune siguripesko. Ov mothavdilo phikoutno pedral olende ano anava e Ministriako, inkuraindoy olen te informingyon e kriteryencar e akceptipesko ano akala institucie, ayekha kay ano yekh pashutno avipe te shay te astargyon sar olenge kotorleutne. Ministri Sveçla nayskergya e organizatoren kotar Ofisi vash Komunitetenge Puqipya ano rami e Sheruneministreske ofisesko.
Savahtuno Talodirektori e Akademiako, Kastriot Jashari, penjargya e prezentunen kay o AKSP sine savaht puterdo vash sah komunitetya kay jivdinena ani Kosova, kontribuindoy ayekha ano bayripe e siguripesko ano than. Ov nayskergya o Ofisi vash Komunitetenge Puqipya pashe e Sheruneministreske Ofisesko, qaqipeya e Elizabeth Katherine Gowing, vash kontributi thay angazhipe olako ano organizipe akale ovipesko.
Phiravutni e butyako e Direktoresko e Departamentesko vash Rendo thay Publikuno Siguripe pashe Misiako e OSBE-ko ani Kosova, Maria de Benito Rodriguez, nays kergya e organizatoren akale ovipesko ano AKSP. Oy vakergya vash olaki eksperienca personaluni ano angazhipe ani policia olake themesko, inkuraindoy thay motivindoy ayekha e ternen kotar o nabuderune-komunitetya kay te shrden e kariera ani nesavi profesia e publikune siguripesko kay on kamena, sar policia, doganieri, korektipesko sevalutno vay yagako aqhavno. Ano lugyaripe olake vakeripesko, oy vakergya ini vash mashkarthemutni dimenzia kay olake personalune dengya e profesia e politiaki, deindoy detalya vash amalipe kay kreiringya e yaver manushenca e yekhuna profesiako kotar e sah lumia.
Jikay, Elizabeth Katherine Gowing, Godideutni e Sheruneministreski vash Komunitetenge Puqipya, nayskergya e Kosovaki Akademia vash Publikuno Siguripe thay e r. Valon Llugaxhiu kotar Ofisi vash KOmunitetenge Puqupoya vash shaipe, angazhipe thay organizipe akale ovipesko vash Puterde Dive vash Komunitetya.Oy informingya e prezentunen kay o kotorleutne ale kotar buderi komune e Kosovake thay sine astarde ini buderi thanutne BRO kay Lenape e puqipyencar e nabuderune komunitetengo.
Dikheni nesave momentya kotar amari vizita ani Akademia vash Publikuno Siguripe:
